لعبوا معانا على المكشوف شالوا النسر وحطوا خروفو
كمان قالوا إننا بلا قافية عايشين وسط بلدنا ضيوفو
الضيف طبعاً يبقى أسير ومهيمن على قلبه الخوفي
عنى يعيش على ملح ولقمة يا إما يفارق بالمعروف
يا هايبعتوا للى هايتكلم لفة بانجو مع حلوفو
الحلوف طبعا مطلوق ولا بيفكر ولا بيشوف
لابس حدوة كبيرة ف رجله وفيه على ضهره بردعة صوف
لعبوا معانا على المكشوف والتزوير ظاهر عينى عينك
ولا بقى فيها خشى ولا كسوف ولا حد راح يقولك فينك
حتى البرقع كمان انشال وإيديهم وصلت مصارينك
حطوا متين قفل على لسانك خلوا الخوف يجرى فى شرايينك
جابوا الحبل وربطوا ودانك بعد ما كنت أسد ف عرينك
اخدوا ف سينا دمى ودمك والأيام دى مش فاكرينك
لعبوا معانا على المكشوف لعبة فرعون والحرامية
وكل حرامى كبير مطلوب قالوا ينجح بالتزكية
واللى عليه العين يتعين ينفع لو عوزناه ف قضية
ينفع شاهد زور ويوالس وإيده وقت الخطف عفية
لعبوا معانا على المكشوف سرقوا مكانك إنت وهيه
لعبوا معانا على المكشوف كشفوا الوش أبوسحنة غبية
لعبوا معانا على المكشوف حطوا حديد ف إيديك وإيديه
بقلم
سيد أحمد الهمشرى
ليست هناك تعليقات:
إرسال تعليق